कापसाला ७९१० ₹ भाव पाहिजे का?, मग हे अँप लगेच घ्या…

महाराष्ट्र शासनाने कापूस उत्पादक शेतकऱ्यांसाठी किमान आधारभूत किंमत हमखास मिळावी यासाठी एक महत्वाचा उपक्रम सुरू केला आहे. या उपक्रमाअंतर्गत शेतकऱ्यांनी ‘कपास किसान’ अॅपवर आपली नोंदणी करणे आवश्यक आहे. शासनाने या योजनेसाठी प्रति क्विंटल ₹७९१० इतकी आधारभूत किंमत जाहीर केली असून, नोंदणी केलेल्या शेतकऱ्यांनाच या योजनेचा लाभ मिळणार आहे.

शेतकऱ्यांनी नोंदणीसाठी काही आवश्यक कागदपत्रे तयार ठेवणे गरजेचे आहे. यामध्ये २०२५-२६ या हंगामातील जमिनीची नोंद (ऑनलाईन अधिस्वीकृत), महसूल विभागाकडून मिळणारे प्रमाणपत्र किंवा कापूस लागवडीची खात्री देणारी इतर प्रमाणित कागदपत्रे (२०२५-२६ ऑनलाईन अधिस्वीकृत), तसेच वैध आधारकार्ड आणि छायाचित्र आवश्यक आहे.

नोंदणी प्रक्रिया अत्यंत सोपी ठेवण्यात आली आहे. शेतकऱ्यांनी सर्वप्रथम ‘कपास किसान’ अॅप मोबाईलमध्ये डाउनलोड करावे. त्यानंतर आवश्यक माहिती व कागदपत्रे भरून स्वतःची नोंदणी पूर्ण करावी. शासनाने स्पष्ट केले आहे की, दिलेल्या कालावधीत नोंदणी करणे बंधनकारक आहे.

नोंदणीसाठी अंतिम तारीख ३० सप्टेंबर २०२५ अशी निश्चित करण्यात आली आहे. या तारखेच्या आत नोंदणी न केल्यास शेतकरी या योजनेपासून वंचित राहतील.

कृषीमंत्री दत्तात्रय भरणे यांनी शेतकऱ्यांना आवाहन केले आहे की, “शेतकऱ्यांच्या हक्काचा योग्य दर मिळवून देण्यासाठी शासन वचनबद्ध आहे. त्यामुळे प्रत्येक कापूस उत्पादक शेतकऱ्याने त्वरित ‘कपास किसान’ अॅपवर नोंदणी करून या योजनेचा लाभ घ्यावा.”

शेतकरी हेल्पलाईन काय सांगते?

या उपक्रमामुळे शेतकऱ्यांना थेट शासनाकडून आधारभूत किंमत मिळेल, शेतकऱ्यांना बाजारातील चढ-उतारांपासून संरक्षण मिळेल आणि त्यांचे आर्थिक स्थैर्य वाढण्यास मोठी मदत होईल.